२८ चैत, काठमाडौं ।
राष्ट्रिय स्वतन्त्र पार्टीका सभापति रवि लामिछानेले सांसद ढाकाकुमार श्रेष्ठले व्यवसायी दुर्गा प्रसाईंसँग घुस मागेको बारेमा भोलि निर्णय लिने बताएका छन् ।
श्रेष्ठले व्यवसायी प्रसाईंसँग मन्त्री हुनका लागि दुई करोड माग गरेको अडियो आइतबार सार्वजनिक भएको थियो ।
त्यसपछि रास्वपाले ७२ घण्टाभित्र श्रेष्ठबारे निर्णय लिने जनाएको थियो ।
केन्द्रीय समितिको बैठक बोलाएर भोलि निर्णय गर्ने रास्वपा सभापति लामिछानेले बताए ।
चितवनमा भएको चुनावी सभामा उनले भने, ‘केन्द्रीय समितिको बैठकका लागि भोलि तयारी रहन मैले साथीहरुलाई भनिसकेको छु ।
तपाईंहरु चितवन आउनपर्ने पनि हुनसक्छ । म काठमाडौं पनि आउनपर्ने हुनसक्छ ।’
अडियोमा उल्लेख भएका व्यक्तिहरु आफू वरपरका भए पनि उनीहरुलाई कारबाही गरिने उनले प्रतिवद्धता व्यक्त गरे ।
अडियोमा मन्त्री बन्नका लागि रविको कोर टिमका सदस्यबाट रकम मागिएकाले आफूलाई सहयोग गर्न श्रेष्ठले प्रसाईंलाई आग्रह गरेका छन् ।
आफ्ना साथीहरुमा पूर्ण विश्वास रहेको उल्लेख गर्दै लामिछानेले उनीहरुको बैंक खाता चेक गर्ने समेत बताए । ‘
भ्रष्टचार विरुद्ध सहने वा ढाकछोप गर्दैनौं ।
हदभन्दा हदसम्मको कारबाही गर्नेछौं,’ लामिछानेले भने, ‘
अरु दलले पनि यस्तै गर्नसकुन् म आफैं तिनीहरुको प्रचारमा हिँड्छु ।’
राष्ट्रिय स्वतन्त्र पार्टी (रास्वपा)को अनुशासन आयोगको बैठक बस्दैछ ।
बैठक ११ बजे पार्टी कार्यालय बसुन्धारामा बस्ने तय भएको छ ।
पार्टीबाट सांसद बनेका ढाका कुमार श्रेष्ठको अडियो प्रकरणबारे छलफल गर्न बैठक बस्न लागेको हो ।
सांसद ढाका कुमारले व्यवसायी दुर्गा प्रसाईंसँग दुई करोड रुपैयाँ मागेको अडियो सार्वजनिक भएपछि पार्टीले उनलाई निलम्बन गरी छानबिन गरिरहेको छ ।
सांसद श्रेष्ठले सोमबार बुझाएको स्पष्टीकरणका विषयमा छानबिन गरेर आयोगले केन्द्रीय समितिलाई सिफारिस गर्नेछ
यसै सिफारिसका आधारमा उनीमाथि पार्टीले कारबाही गर्ने छ ।
ढाका कुमारले भने उक्त अडियो आफ्नो नभइ सम्पादन गरिएको दाबी गर्दै आएका छन् ।
उनीसँग सम्बन्धित दोस्रो अडियो पनि सार्वजनिक भइसकेको छ । उक्त अडियोमा पहिलो अडियोबारे अर्का व्यक्तिमार्फत उनले व्यवसायी दुर्गा प्रसाईंसँग कुरा गर्न खोजेका छन् ।
