सुन तस्करीको सञ्जाल नेकपा माओवादी केन्दका नेता र कार्यकर्ताको वरिपरि घुमिरहेको छ। माओवादी केन्द्र सत्तारुढ दल भित्रको दोस्रो ठूलो पार्टी हो। यसका अध्यक्ष पुष्पकमल दाहालले सरकारको नेतृत्व गरिरहेका छन्।
जताबाट अनुसन्धान सुरु गरेपनि तस्करीको सञ्जाल माओवादीका नेता र कार्यकर्तामै पुगिरहेको समाचार स्रोतहरू बताउँछन्। यसले गर्दा पनि अनुसन्धानमा अप्ठेरो अवस्था आएको उनीहरूको ठम्याई छ।
सिआइबीले ६० जनाभन्दा बढी माओवादीका नेता–कार्यकर्ताको फोन सम्पर्कलाई अनुसन्धानको दायरमा ल्याएको छ। सिआइबीले ६० किलो सुन तस्करी प्रकरणमा अनुसन्धान गर्दा छिरिङको मुख्य सहयोगीका रूपमा पक्राउ परेका किशोर बस्नेतको सम्पर्क माओवादी नेताहरूसँग देखिएको स्रोतले जनाएको छ।
सिआइबी प्रमुख एआइजी किरण बज्राचार्यले सुन तस्करको सञ्जालमा देखिएका सबैलाई अनुसन्धानको दायरामा ल्याइएको दाबी गरिन्। ‘प्रहरीले पार्टी चिन्दैन, शंकाको घेरामा देखिएका सबैसँग सोधपुछ र बयान लिन्छ। नियन्त्रणमा लिएकालाई हिरासतमा राख्नुपर्ने भए अदालतबाट अनुमति लिन्छ,’ उनले भनिन्। उनले अनुसन्धानकै क्रममा छिरिङसँग सम्पर्क देखिएकाले दिपेश पुनसँग सोधपुछ गरिएको पुष्टि गरिन्।
